آزمانے کی ضد نہیں کرتے یوں ستانے کی ضد نہیں کرتے دل پہ کب اختیار ہے اپنا دل لگانے کی ضد نہیں کرتے بھول بیٹھے تو یاد رکھو گے بھول جانے کی ضد نہیں کرتے چند لمحوں کی روشنی کے لیے گھر جلانے کی ضد نہیں کرتے ایک دو پل کی التجا کی ہے ہم زمانے کی ضد نہیں کرتے گھر ہو جیسا بھی آخرش گھر ہے گھر سے جانے کی ضد نہیں کرتے ہم کہ ہجرت مزاج پنچھی ہیں آشیانے کی ضد نہیں کرتے شہر کی سوگوار گلیوں میں مسکرانے کی ضد نہیں کرتے بارشیں جب اداس ہوں ثاقبؔ! گنگنانے کی ضد نہیں کرتے

کسی بے نور شب میں

کوئی جگنو ، کوئی تارا

مری تنہائیوں کا استعارہ

آنکھ کی دہلیز پر اترے

تو کیا معلوم؟

کتنے درد بانٹے

کتنی آنکھوں کو رلائے

کتنی پلکوں کو اذیت سے جگائے

تو یوں کرنا

کہ اس لمحے

وہی جگنو

وہی تارا

مری تنہائیوں کا استعارہ

لبوں میں قید کر لینا

مجھے اس خوف سے آزاد کر دینا

محبت تلخ ہوتی ہے

مگر اتنی نہیں ہوتی

کہ جذبے تلخ ہو جائیں

اور ان جذبوں سے وابستہ

تعلق تلخ ہو جائے

کبھی ہلکی سے رنجش بھی

ہزاروں وسوسے بیدار کرتی ہے

کبھی تھوڑی سے تلخی بھی

دلوں میں نفرتوں کے بیج بوتی ہے

تو ایسے مختصر لمحوں میں

پوری زندگی کا فیصلہ کرنا

نہ تجھ کو زیب دیتا ہے

نہ مجھ کو زیب دیتا ہے

بارش ہو ، تم یاد نہ آؤ!

یہ کیسے ہو سکتا ہے؟

بارش میں اور تم میں

ایک تعلق ہے

بارش سے اور تم سے

ایک سا رشتہ ہے

میری آنکھوں میں جب غم کی

پہلی رِم جِھم برسی تھی

سب سے پہلے

تم نے

اپنے کومل کومل ہونٹوں سے

اُس رِم جِھم سے ڈھانپا تھا

اور اب بارش ڈھانپتی ہے

زندگی!

اس قدر مختصر بھی نہ ہو

میرے ہونٹوں پہ جو تشنگی رہ گئی

تشنگی ہی رہے

اگر معلوم ہو جاتا کہ تنہائی اذیت ناک ہوتی ہے اکیلے ہوں تو ماضی کی سبھی یادیں لباسِ آتشیں پہنے ہتھیلی پر پرانی حسرتوں کا رنگ پھیلائے ہوئے اور پاؤں میں کانٹوں کی کتنی جھانجھریں باندھے نظر کے سامنے جب رقص کرتی ہیں تو آنکھیں خون روتی ہیں اگر معلوم ہو جاتا کہ تنہائی میں اپنے خواب بھی اپنے نہیں ہوتے کسی کی دسترس کا ہر گھڑی احساس رہتا ہے ذرا سی سرسراہٹ بھی کئی خود ساختہ خدشے جگاتی ہے در و دیوار سے وحشت ٹپکتی ہے یہ سنّاٹا ڈراتا ہے اگر معلوم ہو جاتا کہ تنہائی کے موسم سخت ہوتے ہیں ہوا ٹھہری رہے تب بھی بلا کا شور ہوتا ہے کئی طوفان اٹھتے ہیں بدن کو بارشوں میں ا

کوئی اظہار کی صورت نکل آئے

تو اچھا ہے

وگرنہ ان کہے جذبے

ردائے حبس اوڑھے

جنبشِ لب کو ترستے ہے رہے

تو زندگی کے دشت میں ٹھہرے

نہ خود کو کھول پاؤ گے

نہ مجھ کو جان پاؤ گے

ذرا لب کھول کر دیکھو!